قصيدة جحا للشاعر الكبير بجد وبدون مبالغة هشام الجخ امير الشعراء

ازيكم جميعا
من غير ما أطول عليكم
بمناسبة الانتفاضة الحلوة اللي احنا فيها حاليا
وأقصد باحنا
"العرب"

حبيت نتشارك مع أكثر العراء قوة في عصرنا الحالي
وهو هشام الجخ

ياريت تقروا القصيدة لأخرها
لأنها تستاهل فعلا تتقري
قوية لأبعد حد

وان شاء الله هجيب كل قصايده الشعرية هنا

القصيدة بعنوان

..:: جـحـا ::..
..

شعور سخيف
إنك تحس بإن وطنك شيء ضعيف
صوتك ضعيف
رأيك ضعيف

إنك تبيع قلبك وجسمك
وإنك تبيع قلمك وإسمك
ما يجيبوش حق الرغيف

سألوا جحا عن سر ضحكه
قالك أصل اتنين وشبكو
اللى كان من تحت ميت
واللى كان من فوق كفيف

دا شعور سخيف
وشعور سخيف
إنك تكون رمز الشحاتة
تبنى مبنى للشحاتة
تعمل وزراة للشحاتة

يا ساقية دورى ... عدى فوقى ودوسى
نصبوا عليا وشحتونى فلوسى
ربطونى فيكى .. حتى ما اتغميت
هما اللى فرحوا ووحدى أنا اتغميت

أنا اللى صاحب البيت
عايش بدون لازمة
ولما مرة شكيت
إدونى بالجزمة

أنا اللى زارعك دهب
بتأكلينى سباخ
إن كان دة تقل ودلع
بزيادة دلعك باخ
لا شفت فيكى هنا
ولا شفت فيكى ترف
كل اللى فيكى قرف

كرامتنا متهانة
واللقمة بإهانة
بتخلفينا ليه لما انتى كارهانا

يعنى ايه تبقى إنتى هبة النيل يا مزة
وكل يوم المية تقطع
يعنى ايه لما اشتكى غلو الفاتورة
يقولو تشكى بس تدفع

لما قش الرز ثروة بتتحرق
وأما نفط الأمة ثروة بتتسرق
وأما جلادك على ولادك بيبطش
وأما علمك ما يلاقيش يآكل فيطفش

يعنى ايه نرفع ايدينا بالسلام لجل الغزاة
ويعنى ايه لما ابقى ماشى فى حالى اتشد اشتباه
يعنى ايه لما اتحبس أربع سنين حبس احتياطى

يعنى ايه مش حاسة بالعمر وغلاوته
بتصبى مر العمر ليه
دة انا كنت ح اوهب لك حلاوته

أنا عمرى ما أتأمرت
ولا حطيت شروطى
ومكان ما ترسى مركبك
بابنى شطوطى
أنا كنت جيشك لما مماليلك باعوكى
وكنت يوسف لما عشتى سنين عجاف
وضلوعى دى اللى فى معركة قادش حموكى
وشفايفى دى اللى ما بطلتش فى يوم هتاف
دة انا كل شبر فى أرضك اتمرمغت فيه
وكل يوم عشتيه
أنا اتغذبت بيه


علا صوت أدانك جرس
فى الشدة صاحينلك
من امتى كانوا الحرس
هما اللى باقينلك

بعتينى علشانهم
وعنيكى معصوبة
ياهلترى خاينة
ولا زيى مغصوبة



علمونا بالعصاية
ورضعونا الخوف رضاعة
علمونا فى المدارس
يعنى ايه كلمة قيام
علمونا نخاف من الناظر
فيتمنع الكلام
علمونا ازاى نخاف
وازاى نكش
بس نسيوا يعلمونا الاحترام
فمتزعلوش
لما ابقى مش باسمع كلامكم
وماتزعلوش لما ابقى خارج عن النظام

مستنى ايه من طفل ربوه بالزعاق
غير المشاكل والخناق
كل اللى بيقولك بحبك دول نفاق
أنا لما قلت لك بحبك
كان نفاق

الحب يعنى اتين بيدوا
مش ايد بتبنى وستميت تيت تيت يهدو
الحب حالة
الحب مش شعر وقوالة
الحب يعنى براح فى قلب العاشقين للمعشوقين
يعنى الغلابة يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى أعيش علشان هدف
علشان رسالة
يعنى احس بقيمتى فيكى
إنى مش عايش عوالة

يعنى لما اعرق تكافئيى بعدالة
الحب حالة
الحب مش شعر وقوالة

الحب حاجة ما تتوجدش فى وسط ناس
بتجيب غداها من صناديق الزبالة

بارت مراعينا والبئر قد جفَ
والجوع يكوينا والصبر ما كّفى
والقلب لا يهدا والجرح لا يشفى
ولأننا طوع
زنا لهم خفا
جاءوا بموكبهم
واشتغلت الزفة

الدفة مظبوطة
وأصلا مافيش دفة
والكفة مش مايلة
علشان مافيش كفة

و جحا اللى جاى بالليل لساه بيتخفى
شايف ديدان الغيط سارحة ومارحماشى
من جبنه شاف الدود سابه وراح ماشى
ولا اتكسف للناس
ولا حس على طوله
الناس عشمها كبير جريوا بيشكوله
ضحك جحا ضحكة مواشى
مادام بعيد عن طينى ... ماشى

الدود قاعد لك يا جحا ولابد فى طينك
بعد ما يمص فى دمانا مش حيحلاله الا طينك

احنا اهلك
احنا رجالتك
أمانك
إحنا وقت الشدة سندك
إحنا زادك

يا جحا احمى ولادك
لو كنت عايز تحمى طينك
سوف أرحل
ربما يلقانى من ارجو لقاه
هامشى ويا الشحاتين

وابكى على حلمى اللى تاه
بس مش هاشحت رغيف
هاشحت وطن لله


اتمني انها تكون عجبتكوا
المخلص دوما
محمد دونجل

rwd]m [ph ggahuv hg;fdv f[] ,f],k lfhgym iahl hg[o hldv hgauvhx lfhgym hg]n hldv hgauvhx hg;fdv iahl ,j[kk

الموضوع الأصلي : قصيدة جحا للشاعر الكبير بجد وبدون مبالغة هشام الجخ امير الشعراء || الكاتب : DONGULDAD || المصدر : ملتقي ضحكتنا - العالم بين إيديك

السلام عليكم ورحمة الله وبركاته

الراجل ده جامد أوى أوى أوى
بيفكرنى بعبد الرحمن الابنودى فـ لونه وشكله وحتى طريقة كلامه
القصيده بتاعته دى جميله اوى وبتعبر عن حاجات كتيره عايشينها وعايشانا
تسلم ايديك يا محمد منتحرمش من ابداعاتك حتى فـ إنتقاء مواضيعك

. . .

الموضوع الأصلي : قصيدة جحا للشاعر الكبير بجد وبدون مبالغة هشام الجخ امير الشعراء || الكاتب : ليالى الوهم || المصدر : ملتقي ضحكتنا - العالم بين إيديك

يسلمو يا باشا
هو فعلا عالي قوي
بس للأسف انا لسه سامع عنه قريب
مع انه ليه فترة معروف وعامل شغل عالي قوي
وهو فعلا قريب قوي من الأبنودي
اعتقد انه هيبقي خليفته بجد

الموضوع الأصلي : قصيدة جحا للشاعر الكبير بجد وبدون مبالغة هشام الجخ امير الشعراء || الكاتب : DONGULDAD || المصدر : ملتقي ضحكتنا - العالم بين إيديك

انا برضو سمعت عنه من فتره كده مش بعيده اوى
كان ريبير منزله قصيده وعجبتنى ومن وقتها تابعته
خصوصا انى من عشاق عبد الرحمن الابنودى وعندى ليه مجلد كامل من اعماله
هتابع معاك كل جديد هتقدمه للشاعر هشام لانه فعلا يستحق المتابعه
. . .

الموضوع الأصلي : قصيدة جحا للشاعر الكبير بجد وبدون مبالغة هشام الجخ امير الشعراء || الكاتب : ليالى الوهم || المصدر : ملتقي ضحكتنا - العالم بين إيديك

الموضوع الأصلي : قصيدة جحا للشاعر الكبير بجد وبدون مبالغة هشام الجخ امير الشعراء || الكاتب : DONGULDAD || المصدر : ملتقي ضحكتنا - العالم بين إيديك

بجد تسلم ايدك يا دونجل انا حاولت احمل القصيدة دى
اكتر من مرة بس مش كانت بتتحمل معايا
وفرحت اوى لما لقيتها هنا ومكتوبة كمان
تسلم ايدك مرة تانى
وياريت تقدر تجيبلنا بقيت القصايد بتاعة
هشام لانى نفسى اجمع كل قصايده

الموضوع الأصلي : قصيدة جحا للشاعر الكبير بجد وبدون مبالغة هشام الجخ امير الشعراء || الكاتب : سمر احمد || المصدر : ملتقي ضحكتنا - العالم بين إيديك